Universis presentes litteras inspecturis, Carolus, filius regis Francie, Andegavie, Provincie et Forqualquerii comes, et marchio Provincie, salutem. Ad universitatis vestre volumus pervenire notitiam, quod nos ordinationem quam sanctissimus pater et dominus noster, dominus Clemens, sacrosancte Romane et universalis ecclesie summus pontifex, super senatus Urbis articulo, de fratrum suorum consilio et assensu nuper edidit, cum omni animi promptitudine tenore presentium approbantes, in presentia reverendi patris domini S., Dei gratia tituli Sancte Cecilie presbiteri cardinalis, Apostolice Sedis legati, et venerabilium patrum Dei gratia ... Aquensis et Chusentini archiepiscoporum, ac ... Avinionensis et ... Sistaricensis episcoporum, necnon venerabilis viri magistri Petri, domini pape notarii, et aliorum, tactis sacrosanctis evangeliis, juramus et jurando promittimus quod dabimus operam bona fide ut Romanis non juremus regere Urbem ad vitam; item quod finito termino a die quo fiet nobis regni Sicilie concessio computando, vel si infra triennium ipsum, totum predictum regnum vel majorem ejus partem, cui minor non possit resistere, acquisierimus, vel si forte (quod absit!) illud acquirere nequiremus, et de hoc liquido constiterit, senatum dimittemus omnino, illum extunc per nos vel per alium nullatenus resumpturi nec procuraturi quomodolibet, quod senatum ipsum quivis alius ad vitam habeat, aut quod ad illum aliquis etiam usque ad certum tempus absque licentia Romani pontificis assumatur; item quod dabimus operam bona fide ut idem senatus ad dispositionem et ordinationem Romane ecclesie revertatur, cives scilicet Romanos ad hoc sicut melius et honestius poterimus inducendo; item quod dum senatum tenuerimus, nichil scienter in terris ipsius ecclesie, domaniis scilicet et feudis in ejusdem ecclesie vel suorum prejudicium faciemus contra ecclesiam ipsam et ecclesiasticum, et si nos vel nostri quicquam tale fecerimus, id revocabimus sine mora. Nichilominus insuper obligamus nos tenore presentium ad infrascriptas penas quas si contra premissa vel eorum aliquod fecerimus incurramus eo ipso: nos excommunicationis et terra nostra ubilibet constituta interdicti sententiis subjaceamus, quas utique sententias si nos per mensem sustinuerimus, eo ipso cadamus a jure senatus, et si postea de facto senatum tenere contenderimus seu intromiserimus nos de illo, cadamus similiter eo ipso ab omni jure quod erit nobis in regno Sicilie acquisitum. Ut autem hujusmodi nostrum juramentum nostraque promissio et obligatio illibata perpetuo maneant et inconcussam semper obtineant firmitatem, has nostras patentes litteras exinde fieri fecimus, nostro ac predictorum cardinalis, archiepiscoporum, episcoporum et notarii sigillis ad perpetuam memoriam roboratas. Datum Aquis, II kal. maii, pontificatus domini Clementis pape IIII anno primo, anno Domini millesimo ducentesimo sexagesimo quinto.